Furiinka laysku qasbo ma dhacaa
Su’aasha
Hadii si qasab ah lagaga furo xaaskaaga idinko is jecel, weliba dagaal iyo dil la idiinla yimaado MA KAA FURMAYSAA GABADHAADU?
Waad mahadsan tihin.
Jawaabta
Marka hore waa inaan ogaanaa wuxuu yahay qasabka
Qasab waxaa laga wadaa qofka marka loogu gooddiyo in la dilayo ama dhaawac weyn loo geysanayo ama xabsi dheer la dhigayo, qofka ku gooddinaya waa inuu awood u leeyahay inuu fuliyo waxa uu ku gooddiyay
Culimada hore way isku khilaafeen haddii qofka lagu qasbo inuu naagtiisa furo inuu dhacayo furiinka iyo in kale.
Mada’ahbka Xanafiga wuxuu qabaa inuu dalaaqa si kaste ha ahaadee uu dhacayo xitaa qofka haddii lagu qasbo inuu xaaskiisa furo.
waxayna daliilsadeen cumuumka kusoo arooray aayadaha dalaaqa sidoo kale axaadiista dalaaqa.
Laakin mad’habka Maalikiga iyo kan Shaaficig iyo Xanbaliga waxay qabaan inuusan dhacaynin qofka la qasabay furriinkiisa
waxayna daliilsadeen aayadda kusoo aroortay suuratu Annaxal oo ah:
(مَن كَفَرَ بِاللَّهِ مِن بَعْدِ إِيمَانِهِ إِلَّا مَنْ أُكْرِهَ وَقَلْبُهُ مُطْمَئِنٌّ بِالْإِيمَانِ وَلَٰكِن مَّن شَرَحَ بِالْكُفْرِ صَدْرًا فَعَلَيْهِمْ غَضَبٌ مِّنَ اللَّهِ وَلَهُمْ عَذَابٌ عَظِيمٌ)
(Qofkii ku kufriyo Ilaahay markuu rummeeyay kaddib midka la qasbay mooyee isagoo qalbigiisa iimaanka ku xasillan laakin qofka laabtiisa gaalnimo u furay kuwaas korkooda waxaa ku sugnaaday caro xagga Alle ka timid waxayna leeyihiin cadaab weyn)
aayaddan waxay sheegtay qofka la qasbay inaan wax loo qabsanaynin xitaa gaalnimo hadday tahay, marka furiinka waa kasii hooseeyaa gaalnimada.
teeda kale waxay daliilsadeen xadiiska ah :
عن ابن عباسٍ رضي الله عنهما: أن رسول الله صلى الله عليه وسلم قال: (إن الله تـجاوز لي عن أمتي الـخطأ والنسيان وما استكرهوا عليه)؛ حديث حسن، رواه ابن ماجَهْ والبيهقي وغيرهما
(Ilaahay ummadayda wuxuu u dhaafay khaladka iyo halmaanka iyo wixii lagu qasbo)
Marka waxaa xoog badan in qofka la qasbay furiinkiisa uuna dhacaynin.
